قصقاص أمريكانـــي…
اليوم ماشي ندير في علاج طبيعي. طحت في شبوب امريكاني صغير في بداية الثلاثينات…
عموماً بعد الترحيب …شد كراعي….لفّها يمين….لفها شمال….وبعدين لفها في جميع الاتجاهات….وبعد ماكمل التشخيص قالي ارقد على الطاولة وبدا في العلاج الطبيعي…
لكن الشاب هذا شكله قصقاص دولي… خطر علي بعض الحلاقين والتاكسيستا في ليبيا….
في البداية سألني عن الإصابة قلتله نتيجة لعبة كورة…بعدها على طول مسك الخط…شن فريقك المفضل .. وشن رأيك في الريال والبرشة والمانشيستر سيتي و البرازيل وكاس العالم وختمها بالدوري الامريكي…
وبعد ماكملنا الكورة قلت خلاص توا يسكت لكن صاحبانا هضا شكله كان مجرد يسخن…بدا لي في قصة حياتي من البداية.. لعند من كم تعيش في ناشفل..وكم لك مامشيتش لليبيا..وكم عندك من عيال… وبدا يفصفص فيهم واحد واحد…بالتفصيل…
والله يااهل الخير سألني حتى شن تعشيت امبارح…جاب ربك كان عشانا طاجين حوت "سامون”، وربك سترني معاه وفهمها… وقلت في بالي …بالله عليك لو كان عشانا عصبان والا محشي كيف تبي تشرحه له…
عموما صاحبنا هضا في الأخير كمل العلاج وبدا يبي يحجز الموعد الجاي؛ قالي شن رأيك تجي بعد اسبوع؛ قلت له “بالله خليهن أسبوعين على الأقل بيش نحصل مانحكيلك…!!”
اللي يهود افضل من اللي مبزم ومش طايق نفسه ويخدم فوق النفس
ههه...طبعًا ياميلاد التهويد كويس، لكن مش "شن تعشيت امبارح"...هذي قصقصة عزايز..
قصة ممتعة وعجيبة هههه ،، لكن يا افتوحة ما اظن انه بيور امريكي،، اكيد جيناته من جلاوينا ههههه ،، زيد تأكد منه في الجلسة الثانية معاه،، اسحب منه عينة ونحللها هههههه ا
ممكن يطلع كاتب مع العواقير