أرسل احد الاصدقاء قصيدة شعبية لطيفة معبرة.

قام بعض الاخوة والاخوات بإضافتهم عليها

القصيدة الأصلية

******

(( انا خاطري في طلعة..

نرفع معاي اسبيزتي والولعة

وعالة الشاهي،

....

نرفع معاي أوجاعي ..

نخش بَر خالي لاغنم لا راعي ..

حصيري الرملة والوساد ذراعي ..

ونسهر علي نار الغلا المندلعة ..

ننسي اللي هاين عليه وداعي ..

ونجبر عظام الصدر ضلعة ضلعة ..

ونا خاطري في طلعة ..

وكان رد د.هند الساحلي (بنت الشاعر الدكتور علي الساحلي)

وانا خاطري في طلعة ..

نخش الخلا بكتاب شعر وشمعة ..

نشكي ونبكي للسما المستمعة ..

ونمسح دموع العين دمعة دمعة ..

نرفع معاي أوراقي .،

ونرفع معايا حيرتي واشواقي ..

يا حزن يسكن مهجتي واعراقي

يسقيه كاس المر جرعة جرعة ..

نرفع معاي حنيني ..

ونرفع معايا، نجر ثقل سنيني ..

بالكي الخلا يا صاحبي يواسيني ..

ويبقى الونس في غربتي والمرعى ..

ويا ناس نبيي طلعة ..

*******

وهذه إضافتي (محمود زوبي)

ناخاطري فبنغازي

في لم شملي بعيلتي واعزازي

و بيته على شط البحر هدرازي

تمسح على كبدي اللي ملتذعه

ونا خاطري في طلعة

كبدي اللي مشتاقه 

و تداوي مواجع غربتي الفراقه

ما يعرفه لفراق لي ماذاقه

نيران تصهد في خفا مندلعه .

ونا خاطري في طلعه

خاطري في رده

لايام عشناهن و ماضي عدا

فراق وطنا واجع الخاطر كدا 

ينفس الله ههمه و يمسح دمعه.

و ناخاطري في طلعه.

فطلعة بروحي

بالكي الخلا ايبرد سطير جروحي.

يزول الجضر، ننسى سبايب موحي

ونلقى ونس في احضان عشب ومرعى

وياناس نبي طلعه.

تداوي ظليمة ناسي و خيبة رجاي فيهم وطولة ياسي

نجدد حياة الروح يقوى باسي

انرتل كتاب ربي انعاود سمعه.

وناخاطري في طلعه.